Богд Зонхова нь 14-р зууны үед амьдарч байсан бөгөөд 2500 гаруй жилийн өмнө Буддын шашныг үндэслэсэн Бурхан багшийн залгамжлагч гэнэ. Тэрээр “Бодь мөрийн зэрэг” хэмээх гэгээрэхүйн мөрийг заасан судрыг зохиож, Буддын шашинд шинэчлэл хийн дэлгэрүүлсэн нэгэн юм байна.

Монголчуудын дийлэнх хэсэг нь Буддын шашныг 1300 гаруй жилийн турш шүтсээр ирсэн аж. “Зулын 25” хэмээн нэрийдсэн энэ өдөр ямар ч хүний хийсэн буян хэд дахин арвиждаг. Нүгэл хийвэл мөн л үрждэг юм байна.

Шашны төлөөлөгчдийн онцлон хэлж байгаагаар, энэ өдөр хүн бүр эх болсон 6 зүйлийн хамаг амьтны тусын тулд залбирч, маанийн 6 үсгийг амандаа хэлж, амьтны амь тасдаж нүгэл үйлдэхгүйн үүднээс цагаан хоол идэн, сэтгэлээ ариун байлгаж бурхандаа зул өргөдөг ёстой юм байна.

“Их Дүйчин өдрөөр хүрээ хийдүүд сүсэгтэн олонд хандаж Богд ламын чого гэсэн тусгай хурлыг хурдаг. Энэ үед бурханд түм буюу 10 мянган зул барьдаг. Бид 4 дэх жилдээ сүсэгтэн олныг цуглуулан энэ өдрийг тэмдэглэж ирлээ” хэмээн Монголын буддист залуучуудын холбооны дарга П.Буджаргал хэллээ.

Зул бол харанхуйг үгүйрүүлэгч гэрэл. Харанхуйг хамаг муу муухай, ад зэтгэр гэж үздэг учраас эл өдөр хүн бүр сэтгэл дэх муу ёроо үлдэн хөөж буй бэлгэдлээр бурхандаа зул барих нь тустай байдаг гэж Буддын шашинтнууд итгэдэг аж.

Шашны их төв, Гандантэгчэнлин хийдэд Их Дүйчин өдрийн 7 цагаас эхлэн  сүсэгтнүүдийг хүлээн авч Богд ламын тахилгын зан үйл гэсэн тусгай судрын дагуу 800 лам хурал хурна гэж тус хийдийнхэн ярьж байлаа.